CLICK HERE FOR THOUSANDS OF FREE BLOGGER TEMPLATES »

الأحد، 28 سبتمبر 2008

مين بيضحك على مين



الصراحة مش عارفة مين بيضحك على مين يمكن انتو تعرفو الاخوة المدونين والشباب على النت كانو بيدعو بنصر الاقصى فى اليوم العالمى السادس على الانترنت والصراحة مش عارفة هو ايه اللى حصل فى اليوم ده بس اللى اعرفه انه الفلسطنين احتفلوا واستشهد شاب عمره 18 سنة قام بعملية انتحارية وقام الجيش الاسرائيلى بهدم منزله وعدم اقامة العزاء عقابا لعائلته وكمان عدد الشهداء فىالثمانى سنوات الماضية وصل الى 5389 شهيد فلسطينى هى ديه الوقفة بجانب فلسطين احنا كلام مش فعل ده الفرق


اما المسرح القومى اللى اتحرق بسبب الماس الكهربائى زيه زى مجلس الشعب عادى اصل ما فيش عندنا حاجة غلط الكهربة هى اللى دايما تغلط وكمان بتيجى على التاريخ بتاع مصر وسايبة الحاجات التانية لا وما فيش 40 يوم بين الحدثين عادى بردة ما علينا كل واحد يربى كهربة بيته والله حتى الكهربة بتقطع عندنا كتير اليومين دول


اما النكتة الاكبر ان مصر بلد الامن والامان فيها ناس بتخطف لا وسياح طيب مصر عملت ايه ولا حاجة وعرفت تتصرف ده ابو الغيط بقى يقول كلام وبتاع السياحة يقول كلام كانهم من بلاد مختلفة ومش عارفين يوصلو للخاطفين وكل اللى عليهم ان حالة المخطوفين كويسة وزى الفل لكن طبعا كل بلد ليها ظفر مش واحد كامل قامت واعدت واتصالات ووصلو للخطفينهم لكن احنا لسة بنكتم على الموضوع على خيبة ايه انا مش عارفة اصلها حكاية تعود بيقولو الشعب جاهل مش لازم يعرف كل حاجة خلينا احنا فى رغيف العيش اللى شوية يكبر وشوية يصغر ربنا يرسيه على حجم


اكيد عرفتوا مين بيضحك على التانى لان كلوا بيضحك على بعضوا فبلاش نضحك على بعض مش المواضيع ديه بس اللى فيها ضحك لا فى كتير
بس احنا اللى بنكبر دماغنا واهو كله بيعدى لاننا اتعودنا على كدة المصرى شخصيته ادام حكومته معدومة فى ميدان عام
كل سنة وانتم طيبين وعيد سعيد

السبت، 20 سبتمبر 2008

وحشتونى وحشتونى

كل عام وانت بخير ويا رب يكون رمضان كان حلو عليكوا يا رب
وتكونوا قربتوا اكثر من ربنا وتكونوا حققتوا اللى تمنتوه فى الشهر الكريم
وبجد وحشتونى جدا جدا وكنت زعلانة جدا انى مش عارفة اتابعكم الفترة اللى فاتت
لان الكمبيوتر كان بعافية شوية بعيد عن السامعين بس مشاء الله عليكوا جميعا بلا استثناء
انا فخورة جدا بجميع المدونين والمدونات اللى قاموا باعمال الخير الجميلة واللى شاركوا بالمعلومات
الدينية القيمة فعلا انا استفدت كتير من هذه المواضيع وكان نفسى اشارك فى اعمال الخير لكن دايما بعرف
متاخرة عن المواعيد او الاماكن وده اللى خلانى اطرح على نفسى شوية اسالة ومنها
هل فى يوم محدد للمدونين نتجمع فيه يا ريت لو فيه حد يعرفنى ولو ما فيش يا ريت نفكر فى الحكاية ديه
هتكون فرصة جميلة لتلاقى الافكار والمقترحات وهيكون عمل المدونين مؤثر اكتر اه والله هههههههه ديه علشانك مخصوص
وتقريبا كان كل تفكيرى فى انه لازم يبقى فى عمل جماعى طبعا انا عارفة ان كثير من المدونين جزاهم الله كل
خير بيتجمعوا لفعل الخير ونفسى نكون كلنا مع بعض فى عمل منظم يوم معروف لينا جميعا نتقابل فيه ونفكر بصوت
اعلى من كدة وكمان حسيت ان عمل المدونين تقريبا بقتصر على المدونين وان اغلب الشباب اللى المفروض يقرأو
مواضيعكم الجميلة الشيقة المفيدة والاعمال النبيلة مش عارفين ايه هى المدونة وتقدرو تقولوا انى عملت فيها صحفية
ههههههههههههه ونزلت وسط الشباب وسالتهم ايه اللى يعرفوه عن المدونات لقيت ان مش كتير يسمع عنها بالرغم
من ان مواضعكم الجميلة لازم كل الناس تعرفها وتسمعها لانها فعلا تستحق اكتر من كدة بكتير انا واحدة فعلا بجد
ادمنتكم جميعا اسلوبكم اشعاركم المواضيع الدينية و السخرية حتى المواضيع الشخصية بجد ما اقدرش ما اتابعش حد فيكم
والفترة اللى فاتت هى اللى عرفتنى اد ايه انتوا مؤثرين والواحد ما يقدرش يستغنى عنكم ربنا يكتر من امثالكم ويا ريت
نفكر فى الحكاية ديه بجد وفى النهاية اتمنى ليكم هداية وتقرب اكتر الى الله والبعد عن التلفزيون فى اخر عشر ايام من رمضان
وكل سنة وانتم طيبين لبداية الدراسة طبعا واكيد زحمة المرور ربنا يسترها وتكون بداية سنة جميلة عليكوا ولازم تفكروا
فى الموضوع ده اتمنى لكم ايام سعيدة

الاثنين، 1 سبتمبر 2008

رمضان كريم


رمضان كريم عليكم جميعا ويا رب تكونوا بخير دايما

الصراحة انا بجب الشهر الكريم جدا لانه بيصحى فينا العادات والتقاليد

اللى بننساها مع هموم الدنيا وكمان منظر الشوارع والانوار والزينة

بيرجعنى لايام زمان اللى انا ما عيشتهاش وبحس ان مصر كلها عيلة واحدة

مترابطة ومتحابة لاننا بنشترك فى كذا حاجة جميلة .

وكان فى شوية حاجات كدة حبيت ادردش معاكوا فيها يلا بينا

اولا ربنا يكفينا شرها يا رب هى ايه اكيد ما فيش غيرها مسلسلات رمضان وما اكثرها

وتيجى تفتح التيلفزبون وعينك ما تشوف الا النور ما فيش قناه بتثبت ديقية اشوف مشهد من هنا

على لقطة من هنا وفى اخر اليوم اجمع مع نفسى انا بدعو كل بيت يقفل التيلفزيون بالضبة والمفتاح

فى الشهر الكريم اه والله النفس امارة بالسوء هههههههههه

ثانيا لازم نصل الرحم يا جماعة والام والاب اهم من اى حاجة اكيد واللى زعلان من حد واللى مضايق من حد

ينسى بقى ويسامح احنا فى شهر كريم وكمان انت اللى هتبتدى وهتصالح ماشى اتفقنا .

ثالثا بعد يوم من الصيام الطويل والمدفع يضرب والناس تفطر بالهنا والشقا بس الاكل يكون على اد العيلة

واللمة مش تبص تلاقى على السفرة اشكال والوان من الاكل الرسول عليه الصلاه والسلام بيقول

صوموا تصحو ا وكمان الدراسات اثبتت ان الفرد مش محتاج الا الوجبة العادية لا زيادة ونقص ديه دعوة

للحفاظ على الصحة وخصوصا ان شهر رمضان نعمة لان المعدة بتستريح من الشغل طول السنة اما الحلويات

المفجاة انها ممكن بكوب بلح بالبن وديه سنة عن الرسول ممكن نستغنى عن اى نوع حلويات لكثرة فوائده والمشى

ساعة ولا اتنين بالليل كدة تمام اوى وهتدعولى خالى بالكوا من صحتكو ا رمضان شهر العبادة اكتر منه شهر الاكل اه والله .

واخيرا وليس اخرا بتمنى لكم رمضان كريم وصحة اجمل وصلة رحم الاهل والاصدقاء والتقرب من الله وربنا يتقبل منكم

واعذرونى على تكمله القصة الغريبة ديه ان شاء الله البوست الجاى ههههههههههه

الأربعاء، 20 أغسطس 2008

حقيقة ام خيال

ااصراحة انا عارفة انى مش ليه ولا فى الكتابة ولا فى الشعرو لا فى الروايات



وبقدم اعتذارى لاقتحامى هذا المجال ويا ريت تستحملونى فى البوست ده لانى



هقدم زى قصة او فكرة قفزت الى عقلى وارغمتنى على تحويلها الى قصة واللى



يقدر يستحمل يكمل واللى يزهق برضه يسيبلى سلام رخامة بقى هههههههههه



هيا الى الملل



انها احدى اليالى الباردة الطقس صافية السماء مرحة الاجواء واذا بها ترى الضوء الساطع من القمر



وهو يداعب عيناها الجميلتان العسلبتان المليئتان بالحب والحنان لكل من حولها من اصدقاء وجيران .



هيا الفطار جاهز يا برنسس (علا) كان هذا الصوت الحنون الرقيق صوت اخت (علا) الكبرى (سما)



وقد انهت الفطارلاختها والذى يتكون من اشهى الاطعمة من مربى وجبن والبيض والزبد وكوب اللبن



الطازج وكان هذا هو المفتاح لبداية يوم مرتاح لاجمل شتاء فى الصباح .



وكالعادة انهت علا و اختها الفطور وفى لخمة وسرور خطفت علا الجرنال والمغتاح لتهرع الى الباب



وتنزل الدرجات فى خفة ونشاط وفى صياح القت الصباح على عم عبده بواب العمارة وتفتح هى باب



السيارة وتحلق لمقر عملها حيث كانت علا فتاه فى الخامسة والعشرين من عمرها



تعمل كمصممة اعلانات فى احدى اكبر الشركات ولديها من الاصقاء الشباب والبنات .



وصلت علا الى مقر عملها رحب بها عم محمد امن الشركة و بوجه بشوش نظرت اليه علا



وابتسمت دليل على الترحاب واخذت علا طريقها الى داخل الشركة حاملة اوراقها مبتسمة مرحة


محبوبة من الجميع وكان هو يقف عند الاستقبال طويل القامى وعريض الكتفين اسود الشعر فيه


من الثقة ما بمل الى الغرور نظر الى الوجه البشوش الى ان صعدت المصعد الكهربائى .


وفى مكتبها الجميل المرتب المزين باجمل الرسومات والتى قامت برسم معظمها والاخرى لاشهر الرسامين


سمعت قرع الباب اذنت بالدخول اذ هو يطل عليها بوجه سار وفرح وهى كادت تصاب بنوبة قلبية حين راته .


احمد اهذا انت حقا انا لا اصدق تفضل انت تغيرت كثيرا اه منها هذه الايام التى تفرق بين الاصدقاء القدامى


احمد يرد عليها بلهفة وشوق ما اجملك لقد تغيرت بالفعل وها انت تحققين احد احلامك بالعمل كمصممة اعلانات


ولكن يا احمد ما الذى جاء بك الى هنا عمل ام شوق لرؤيتى وابتسمت ابتسامة صافية جعلتها فاتنة وكانها ملاك


حانية ولكن فيها شيئا من السخرية .


اه طريقتك لم تتغير انا هنا لعمل ولو اننى اعلم انك تعملبن هنا لما جئت من الاساس وبدوره ابتسم بل ضحك


ضحكة عالية لتذيب سخرية ضحكتها السابقة وهكذا هو حال اصدقاء الطفولة يضحكون ويسخرون ويتشوقون


لبعضهم ولكن .


&فى الجزء الثانى &


اريد نقدا بناء دون مجاملات لانى عارفة انى ما ليش فى الكتابة


انا عايزة اسمع عيوب وشكرا لحسن المتابعة فى الحلقة القادمة ههههههههههه

الثلاثاء، 12 أغسطس 2008

تاج الملوك للناس اللى بيحبوك

انا بشكر صديقى العزيز حسن حنفى لتمريرة التاج


استعنت على الشقى بالله

&اعطيتك 3 وردات من هم الثلاث اشخاص اللى هتهديهم الورد اللى معاك؟



  1. والدى و والدتى اكيد زديه اقل حاجة ليهم


  2. وردة لكل انسان وصديق عرفته وجميع المدونين طبعا


  3. واجمل وردة لكل شهيد على الكرة الارضية

&لو اعطيتك ورقة بها 3 سطور وقلتلك اكتب اللى انت عايزه تكتب ايه؟




  1. يا رب اصلح حال الامة العربية ووحد كلمتها


  2. يا رب ندخل جميعا الجنة قولو امين


  3. يا رب كل اللى نفسه فى حاجة خير تتحقق

&ما هو هدفك فى الحياه؟




  1. ان شاء الله ارد الجميل لوالدى و والدتى واسعدهم


  2. واتمنى انى اساعد اى كائن حى وربنا يقدرنى على كدة يا رب

& ان شاء الله بكرة احسن من النهاردة هل تصدق هذه المقولة و لماذا؟




  1. اكيد مصدقة لانى لو مش مصدقة ده معناه انى لغيت كلمة امل من القاموس

والدنيا وده مش من شيم المؤمنين ابدا يا رب كلنا نتفائل خير


& اجمل مقولة سمعتها فى حياتك ؟




  1. اذا اردت ان تعرف ما لك عند الله فانظر ما لله عندك


  2. اذا غشك صديقك فاجعله مع عدوك

& من المغنى اللى بتحبه اوى ؟




  1. هم كتير ( فيروز _عمرو دياب _محمد منير _ام كلثوم )

& ايه احلى اغنية بتحبها ؟




  1. القدس لفيروز


  2. ورجعت من السفر لعمرو دياب

& غزة تمثل لك ايه فى حياتك ؟




  1. هى بلد عربى محتل صامد وفخر لكل مواطن عربى بشهدائها

ومقدساتها ومن صغرى وانا بتمنى ااشهادة فى سبيل استردادها


& اعطى لانتمائك لوطنك درجة من مية ؟




  1. انا ممكن اعوض درجة الثانوية العامية هههههههههههه وادى نفسى99%

& لو تزوجت وانجبت ولدين وبنتيناى الاسماء تختار؟




  1. الولدين الاول طبعا لان الرجال قوامون على النساء هههههههههه



  • يوسف ادم

2 اما البنتين * علا * سندريلا


& عمرك غشيت فى امتحان وانت صغير ؟




  1. والله ولا وانا كبيرة هههههههههه الحمد لله التربية طمرت

& لو اتعرضت عليك رشوة كبيرة وانت فى زنقة مالية ختعمل ايه ؟




  1. ربنا ما يوقعنا فى ازمات ابدا بس مش هعمل حاجة هقوله اتقى

فى دينك واسيبه وامشى وافك نقتى بما يرضى الله


& قول 3 صفات ب3 كلمات بس توصف بيهم شخصيتك.؟


من اصعب الاسئلة اللى شوفتها فى حياتى بس هحاول




  1. متفائلة


  2. فضولية فى التعليم


  3. بحب المرح

& ايه المجال اللى غير دراستك وشايف نفسك فيه ؟




  1. انا لسة مش ثبت نفسى فى مجال دراستى بس ممكن يكون ادار الاعمال

& بتحب السفر ؟




  1. جدا جدا جدا وخصوصا بليل واتمنى الف بلاد العالم

& دلوقت ايه المكان اللى نفسك تكون فيه ؟




  1. القدس

& تمرر التاج ده لمين ؟


والله انا بحبكم واعزكم جدا علشان كدة مش هتقل


ومحدش يخلى فى نفسه حاجة اللى عايز التاج يتفضل انا بمرره

الثلاثاء، 29 يوليو 2008

حبيب الملاييييين



يوسف شاهين (جو )


رحل عنا المخرج الكبير رمز من رموز السينما


المصرية والعالمية وقد نعته الصحف العالمية والاعلام


(رحيل المخرج الاسطورى المصرى )


وهو يستحق فقد كان لديه من الجرأة والفن الكثير


وبالرغم من شهرته وعالميته فلم يبفقد مصريته ابدا


وقد ظهر ذلك فى اختياره لافلامه السياسية


التى كانت تقوم بتمثيل الاحداث السياسية فى مصر


ومنها المهاجر 1994 والمصير 1997والاخر 1995واسكندرية نيويورك2004


والكثير والكثير من افلامه الناجحة


ولقد شارك ايضا فى اخراج الفيلم الامريكى september11 والذى


شارك فيه 11 مخرج عالمى


لقد رحل عنا المخرج الكبير ولكنه سيظل


ملك السينما المصرية والعالمية


********************************


ما شربتش من نيلها


*************


اغنية لشرين جميلة جدا لانها لمصر بس يا ترى هى لوحدها بتحي مصر و


انت كمان بتحبها ؟


انا عن نفسى بحب مصر جدا وبحب شعبها اللى ما فيش زيه ابدا فى طيبته


وبزعل جدا لما اشوف ناس شغالة هدم فى حماس شبابنا ما مش كل من عنده مشكله


تبقى مصر هى السبب مصر مالهاش دعوة احنا السبب احنا اللى عايشين فيها


وبأدينا نعليها على راى شرين فى الاغنية


واللى انا شايفاه ان كل واحد مضايق يطلع بعلو صوته يصرخ ويشتم فى مصر


واللى جابو مصر ليه يا ابن الحلال


ما فى ناس ناجحة عندهم زيادة ايد ولا رجل احنا مشكلتنا اننا بنفخم من المشاكل اوى


لكن النجاح بنحطه فى بير غويييط علشان ما صدقش انه فى نجاح


انا مش بقول ان مصر جنة على الارض بس كل بلد وفيها الوحش


التعليم وحش ماشى بس فيه الحلو بس تقول ايه


الحسنة تخص والسيئة تعم


احنا شبابنا عنده حماس كبير بس مش عارف يوظفه زاى هى ديه المشكلة


احنا عايزين اللى يحركنا زى العرايس من فوق


بس فى شباب كتيرة اتصرفت وسابت العرايس لانها مؤمنة بالامل والنجاح ومنهم مخترعين


وفنانين وكتتير من النماذج المشرفة


الشباب اللى عايز الحاجة سهلة هو اللى بيتعب نفسه والمشكله اننا بنعرف نقلد تقليد اعمى كويس


نقلد فى الخلع قصدى فى اللبس واحسن موضة والميكياج والحاجات الهايفة الجميلة ديه


لكن عمرنا ما حولنا نقلد اليابان اللى هم ضعف ضعفنا فى السكان والتكنولوجيا برده


ما فكرناش هم كدة ازاى وازاى مش اتخلو عن اصلهم


احنا عندنا الفلاحين سابو اراضيهم علشان يشتغلو فى المدينة والحكومة اللى


هتزرع وتاكل وتجوز زتفسحنا كمان ما هى الشماعة بتعتنا


صراحة انا ةاكيد غيرى كتير بيحب مصر وعايز يعمل حاجة بجد


وعايز يغير فيها واكيد هنغير وللاحسن


وبقول للناس اللى شغلة احباط فينا يكلامهم سيبونا فى حالنا احنا عندنا امل وهيفضل موجود


مصر لسة بخير واحسن من غيرها وكفاية ان كتير حاطط عينه عليها بس احنا مش خاسين


كفاية اننا عندنا النيل ونصيحة لو مضايق من حاجة روح عنده واشكيله وصدقنى


هتستريح اوى حتى لو كنت فى اخر بلاد المسلمبن


ودايما فى حياه طول ما فى امل


مصر ام الدنيا


***************


انا عارفة انى كلامى مش على هواكو بس انا نفسى اسمع تعليقاتكم


واللى شايف انه عنده كلام كتير عايز يوصلهولى ده ايميلى


الجمعة، 11 يوليو 2008

عجبت عليكم يا بشر


فعلا البشر دول حاجة غريبة

ونوعيات كتير برده ما تقدرش تصنفهم

وانا مش هكدب وقول انى قابلت كتير منها بس على الاقل

اللى قابلتهم كفاية انهم ورونى حاجات كتير فى الانسان مش كنت عايزة اعرفها

اول حاجة عرفتها ان ما فيش انسان يخلو من الشر

وكل واحد عارف نفسه واللى عمله كويس

وبشر تدعى الفقر والجوع وفى اول مناسبة تلاقيها اجدع من اجدعها مليونير

طب كان ليه من الاول

ولا الناس المحبة للمظاهر والكلام الفارغ حاجة غريبة وتفقع المرارة

وناس عندها لا مبالاه فظيعة وتحس انها مش من كوكب الارض

وناس تدعى انها عايشة للاخرة والله اعلم بالنية

اساسا علشان الواحد يتكلم على كل نوع عايززمن

وبشر طيبة وقلبها ابيض ودول مش كتير

وبشر دايما شايلة طاجن ستها

وبشر عايشة للدنيا ومستعدة لاى تنازلات

وبشر وبشر وبشر

كل الحكاية ان الواحد لما بيشوف الاشكال الغريبة ديه

وازاى ان الانسان ممكن يكون ليه اكتر من وش

وانه ممكن يكون ادامك بوش ومن وراك بوش

بس مش قهوة يعنى هههههههههه

بس بجد الواحد بيخاف ويبقى مطضر انه

يقوم بشوية اختبارات علشان يعرف اللى ادامه

قبل ما يامن لحد ويثق فيه

بس فى الاخر برده الانسان هو الانسان

سيبك انت

انما الاعمال بالنيات ولكل امرئ ما نوى

والدنيا مليانة ناس وناس

بس المهم تختار صح

فى كل حاجة